মুখ্য পৃষ্ঠা
06/04/2514:37
"তুমি কেনে আছা ডিক্ৰং"
তুমি কেনে আছা ডিক্ৰং !
পাহাৰ বুকু ফালি ,
শিলে শিলে জপিয়াই
তোমাৰো লাগে নেকি ভাগৰ ?
তোমাৰ অবিৰত যাত্ৰাত সংগী হয়
মোৰ অযুত প্ৰশ্ন |
অ' মোৰ মৰমৰ ডিক্ৰং
জেঠৰ তেজাল দুপৰিয়া বোৰ
কিদৰে লোৱা তুমি বুকুত বান্ধি !
শীতৰ কুঁৱলীৰ আঁচল টানি
তুমি মাথো ভটিয়াই অনন্ত দূৰলৈ |
অসীমত পৰেনে মনত তোমাৰ
মোৰ চিৰ সেউজ গাওঁ খনিলৈ !
দুভাগ ৰাতি মাতালৰ নিনাদত
উচপ খাই তোমাৰ বুকুলৈ চাওঁ |
সমীৰণে কৈ যায় কানে কানে
তোমাৰ আছে দুখৰ বাতৰি |
ৰঙছোৱা পলসে যেতিয়া দুভৰি টানে
ছাইৰঙী চিতা বোৰত দুচকু থমকে |
দূৰৈত জ্বলা থকা বনজুই একুৰা
নখদৰ্পণত পলে পলে জিলিকে |
সাৰে থাকে পিতাই
কিজানি নিয়া তুমি খেতিডৰা উটুৱাই |
লুইতৰ বুকুত যেতিয়া জোনটো ডুবি থাকে
ময়ো ডুবি পৰো তোমাৰে চিন্তাত |
তুমি কেনে আছে ডিক্ৰং ?
তুমি কেনে আছা !!
© ৰাজু কলিতা
10/11/14
